Azərbaycan Könüllü Təşkilatları İttifaqı

Azərbaycan Könüllü Təşkilatları İttifaqı — Azərbaycanda könüllülük hərəkatının inkişafı üçün təsis edilmiş ittifaq. 20 avqust 2020-ci il tarixində təsis edilmişdir. İttifaq 5 oktyabr 2020-ci il tarixində dövlət qeydiyyatından keçmişdir.

İttifaqın yaradılması Azərbaycan Respublikasının Prezidenti İlham Əliyevin çağırışına cavab olaraq koronavirus infeksiyasının Azərbaycanda yayılmasının və onun törədə biləcəyi fəsadların qarşısının alınması məqsədilə dövlət tərəfindən atılan bütün zəruri addımlara töhfə vermək məqsədilə formalaşdırılmış və bu müddət ərzində öz effektliyini sübut etmiş Azərbaycan Könüllülərinin Əlaqələndirmə Mərkəzinin bazasında yaradılmışdır. İttifaqın strateji məqsədləri könüllü təşkilatlarının dəstəklənməsi və potensialının artırılması, könüllülüyün ölkə ərazisində təşviqi və təbliği, könüllülərin inkişafı və daha geniş könüllülük imkanlarının yaradılması, könüllülük sahəsində beynəlxalq əməkdaşlıqların genişləndirilməsidir.