Қарағанды Бөкетов университеті

Қарағанды мемлекеттік университеті (ҚарМУ) 1972 жылы Қазақстан КП Орталық Комитеті мен Қазақ КСР Министрлер Кеңесінің Қаулысымен құрылған.
Ол Қазақстандағы екінші университет болып, Қазақ мемлекеттік университетімен бірлесе отырып елімізде классикалық университеттік білім берудің дамуына үлкен үлес қосты. Бұл істе университеттің алғашқы ректоры, академик Ебіней Арыстанұлы Бөкетовтің еңбегі зор. 1991 жылы университетке оның есімі берілді.

Университет өмірінде тарих пен қазіргі заман, дәстүр мен жаңашылдық өзара тығыз байланысты. Тарихында университет ұлттық жоғары білім беру саласының көшбасшыларының қатарында болды.

Бүгінгі таңда Қарағанды Бөкетов университетінің беделі тәуелсіз аккредитациялық және рейтингтік агенттіктердің жоғары бағасының арқасында нығая түсті.