ҚР ҰЛТТЫҚ МУЗЕЙІ

Қазақстан Республикасының Ұлттық музейі 2014 жылы "Мәдени мұра" мемлекеттік бағдарламасын іске асыру шеңберінде құрылды. Еліміздің бас алаңы – Тәуелсіздік алаңында орналасқан. Музей ғимаратының аумағы - 74 мың шаршы метрден асады. 

Ұлттық музей сәулеті жағынан жаңа технологияның жетістіктерін қолдана отырып салынған әлемнің үздік 10 музейінің қатарына, ал ТМД елдері арасында үздік бестікке енеді.

Музей қорында Қазақстанның ерте ғасырдан бүгінгі күнге дейінгі археологиялық, этнографикалық жәдігерлері мен мәдени ескерткіштері жинақталған. Экспозициялық алаңы 18 залдан тұрады. Олардың қатарында: Нұр-Сұлтан залы, Тәуелсіз Қазақстан залы, Ұлы Даланың ежелгі өнері және технологиялары залдары, Ежелгі және орта ғасыр тарихы залы, ХІІІ-ХХ ғғ. Қазақстан тарихы залы, Этнография залы, Қазіргі заманғы өнер залы. 

Музейде танымал  археологтар, тарихшылар, этнографтар мен музей саласының кәсіби мамандары қызмет етеді.