ᑑᒑᓕᒃ | Tuugaalik

ᑑᒐᓕᒃ ᐃᑭᐊᖅᑭᕕᒃᑯᑦ ᐃᓄᒃᑎᑐᑦ ᐃᓕᓐᓂᐊᖅᑎᑦᑎᓂᕐᒧᑦ ᐱᓕᕆᕕᒃᓴᖅ, ᓴᓇᔭᐅᔪᖅ ᕆᐊᑦ ᒪᐃᐳᒃᑯᓐᓄᑦ ᑕᕐᕆᔭᒃᓴᓕᐅᖅᑎᓄᑦ ᐃᑲᔪᖅᓯᖅᑕᐅᓪᓗᑎᒃ ᒐᕙᒪᒃᑯᓐᓄᑦ ᓄᓇᕘᒥᑦ-ᐃᓕᖅᑯᓯᓕᕆᔨᒃᑯᓐᓄᓪᓗ. ᐱᒻᒪᕆᐅᑎᑦᑎᕗᑦ ᓴᖅᑭᔭᖅᑎᑦᑎᓂᕐᒧᑦ ᐱᓕᕆᔾᔪᑎᒃᓴᐅᔪᓂᒃ ᐃᑭᐊᖅᑭᕕᒃᑯᑦ ᐃᓕᓐᓂᐊᕈᑎᒃᓴᐅᔪᓂᒃ, ᐱᖃᓯᐅᑎᓪᓗᒋᑦ ᐱᓕᕆᐊᕆᔭᐅᑦᑎᐊᖅᓯᒪᔪᐊᓗᐃᑦ ᑕᕐᕆᔭᒃᓴᐃᑦ ᐊᒻᒪᓗ ᐊᑭᖃᖏᑦᑐᒥᒃ ᐱᕕᒃᓴᐅᓪᓗᑎᒃ ᐱᓕᕆᔾᔪᑎᒃᓴᓂᒃ, ᐱᓕᕆᐊᖑᔪᓐᓇᖅᑐᖅ ᐃᓄᓐᓄᑦ ᐅᑭᐅᖏᑦ ᖃᔅᓯᑐᐃᓐᓇᐅᒐᓗᐊᖅᐸᑕ ᓇᒥᑐᐃᓐᓇᖅ ᓄᓇᓕᐅᔪᓂᒃ ᐃᑭᐊᖅᑭᕕᖃᖅᑐᓄᑦ. ᐊᑐᓕᖅᑕᐅᖁᔭᕗᑦ ᐱᕙᓪᓕᖅᑎᑦᑎᔪᒪᓪᓗᑕ ᒪᓐᓇᕐᓂᓴᓂᒃ ᐊᒻᒪᓗ ᓯᕗᓂᑦᑎᓐᓂᒃ ᑭᖑᕚᕆᓄᑦ ᐊᔪᖏᑦᑎᐊᕐᓗᑎᒃ ᐃᓄᒃᑎᑐᑦ ᐅᖃᓪᓚᒍᓐᓇᖁᓪᓗᒋᑦ-ᐅᖃᐅᓯᑐᖃᕆᔭᐅᓯᒪᔪᒧᑦ ᐃᓄᐃᑦ ᐅᖃᐅᓯᖓᓐᓂᒃ.
ᐅᑉᐱᕈᓱᑉᐳᒍᑦ ᑕᐃᒪᒃ ᐊᑦᑕᕐᓇᖏᑦᑎᐊᖅᑐᒥᒃ ᐱᑎᑦᑎᒍᒪᓪᓗᑕ, ᐃᑲᔪᖅᓯᖅᑕᐅᓯᒪᑦᑎᐊᕐᓗᑎᒃ, ᐊᒻᒪᓗ ᐱᖃᑕᐅᑎᑦᑎᑦᑎᐊᕈᓐᓇᕐᓗᑎᒃ ᐃᓕᓐᓂᐊᖅᑎᓪᓗᒋᑦ ᐃᓕᓐᓂᐊᕐᕕᒋᔭᖏᓐᓂᒃ, ᐱᕙᓪᓕᖅᑎᑦᑎᔪᓐᓇᖅᐳᒍᑦ ᐃᖏᕐᕋᑎᑦᑎᒋᐊᕐᓗᑕ ᐃᓄᒃᑎᑑᕈᓐᓇᕐᓂᕐᒧᑦ ᐊᒻᒪᓗ ᐃᑲᔪᖅᓯᓗᑕ ᐊᑐᖅᑕᐅᔪᓐᓇᓕᑦᑎᐊᖁᓪᓗᒍ. ᑑᒐᓕᒃ ᑕᑯᓐᓇᒐᖃᖅᐳᑦ ᓯᕗᓂᑦᑎᓐᓄᑦ ᑕᐃᒪ ᐃᓄᒃᑎᑐᑦ ᐅᖃᐅᓯᖅ ᐱᕈᑦᑎᐊᕈᓐᓇᖁᓪᓗᒍ, ᑲᔪᖏᖅᓴᐃᓂᕐᒧᑦ ᐃᓄᓐᓂᒃ ᓇᒥᑐᐃᓐᓇᓕᒫᖅ ᑲᓇᑕᒥᑦ (ᐊᒻᒪᓗ ᐅᖓᑖᓄᑦ) ᐱᔪᓐᓇᑦᑎᐊᕐᓗᑎᒃ ᐊᑐᕈᓐᓇᖁᓪᓗᒋᑦ ᐅᖃᐅᓯᕐᒥᓂᒃ ᐃᓅᓯᖏᓐᓂᒃ ᐊᑐᕈᓐᓇᖁᓪᓗᒋᑦ ᐊᒻᒪᓗ ᐊᑐᐊᔪᓐᓇᕐᓂᖅᓴᐅᖁᓪᓗᒋᑦ ᐃᓕᖅᑯᓯᑐᖃᖏᓐᓄᑦ. ᐱᒻᒪᕆᐅᒍᓱᑉᐳᒍᑦ ᑲᑐᔾᔨᖃᑎᖃᕈᒪᓪᓗᑕ ᓄᓇᓕᐅᔪᓂᒃ, ᐃᓕᓴᐃᔨᓂᒃ, ᐊᒻᒪᓗ ᐅᖃᐅᓯᓕᕆᔨᒻᒪᕆᓂᒃ ᑕᐃᒪᒃ ᑕᑯᓐᓇᒐᕆᔭᕗᑦ ᑲᔪᓯᔪᓐᓇᖁᓪᓗᒍ-ᐊᒻᒪᓗ ᓯᕗᒧᑦ ᑕᑯᓐᓇᕈᒪᕗᒍᑦ ᐃᓕᓐᓂᒃ ᐱᖃᑕᐅᖁᔨᓪᓗᑕ ᐃᖏᕐᕋᓇᓱᓐᓂᕆᔭᑦᑎᓄᑦ ᐊᒻᒪᓗ ᖁᕕᐊᓱᒍᑎᖃᕐᓗᑕ ᓴᖏᓂᐊᓗᖏᓐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ.