Peşə Təmayüllü Siniflər

“Peşə Təmayüllü Siniflərin Təşkili” layihəsi 2019-2020–ci ildən fəaliyyətə başlayıb. Layihə paytaxt və bölgələrdə 35 məktəb, 55 sinif, 1187 şagird, 165 müəllim heyəti ilə tədris prosesini davam etdirir. Ötən tədris ilində layihə çərçivəsində dülgər, çilingər, aşpaz, kombi-kondisioner ustası və santexnik, mebel quraşdırma, aqronom, dərzi peşə ixtisasları tədris edilirdisə, cari tədris ilində qənnadçı, bər-bər, xalçaçılıq, İKT olmaqla daha 4 peşə ixtisasının tədrisinə başlanılıb. Həmçinin cari ildən 20 məktəbdə “STEAM”  metodologiyası tətbiq edilir.

X-XI sinif şagirdləri üçün nəzərdə tutulan layihənin yaradılmasında məqsəd ümumi orta təhsil bazasında təhsilalanların peşələr üzrə ilkin bilik və bacarıqlara yiyələnməsi, peşə ixtisasları barədə məlumatlandırılmaqla əmək bazarına, eləcə də peşə təhsilinə hazırlanmasıdır. Təhsilalanlara ilkin sahibkarlıq bacarıqlarının aşılanması, əmək bazarının peşəyönümü hazırlıqlı və əmək qabiliyyətli şəxslərlə təmin edilməsi əsas məqsədlərindən biridir.