Mubashir Zaidi

نصف صدی کا قصہ ہے دو چار برس کی بات نہیں
حفیظ جالندھری نے یہ مصرع اپنے فن کے بارے میں لکھا تھا۔ میری زندگی کی نصف صدی مکمل ہوئی لیکن میرے پاس کوئی فن نہیں۔ کہانیاں سناسکتا ہوں۔ یہ کوئی ہنر نہیں۔ کہانی ہر شخص سنا سکتا ہے۔ کہانیاں سب کے پاس ہوتی ہیں۔

میں نے صرف کہانیاں لکھی نہیں، کئی کہانیوں کا کردار بھی ہوں۔ عبدالقیوم شاد نے جاسوسی ڈائجسٹ کی سلور جوبلی پر کہانی لکھی تو مجھے بھی کردار بنایا۔ میں نے کراچی کے انوکھے محلے انچولی میں بچپن گزارا، پی ٹی وی پر کوئز جیتا، جنگ میں میری سو لفظوں کی کہانی پانچ سال تک روزانہ چھپتی رہی، اب ہفتے میں دو دن چھپتی پے۔ جیونیوز میں 15 سال کام کیا اور تاریخ بنتے بگڑتے دیکھی، دبئی میں کئی برس رہا، مکہ مدینہ کربلا نجف دمشق مشہد یروشلم کی زیارات کیں، یورپ کے کئی ملک دیکھے اور اب امریکا کی خاک چھان رہا ہوں۔ سیلیبریٹیز، سیاستدانوں، علما، ادیبوں شاعروں، بڑے صحافیوں، "ملحدوں" اور "غداروں" سے ملاقاتیں رہیں اور ان کی محفلوں میں شریک رہا۔ ان کی کہانیاں ان کی زبانی سنیں۔ ہاں، بہت سے حسین لوگوں سے بھی تعلق رہا۔
کیا اہل حسن سے مراسم کے بغیر کوئی افسانہ کہہ سکتا ہے؟