Ministry of Women's Affairs of Cambodia

ក្រសួងកិច្ចការនារី គឺជាយន្តការជាតិសម្រាប់ការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី។ ក្រសួងកិច្ចការនារី ដើរតួនាទីជាអ្នកជម្រុញ(កាតាលីករ) ស្វែងរកការគាំទ្រមតិ និងសម្របសម្រួលដើម្បីលើកទឹកចិត្តដល់ក្រសួង ស្ថាប័នរដ្ឋ សង្គមស៊ីវិល និងវិស័យឯកជន ក្នុងការបញ្ចូលសមភាពយេនឌ័រ ទៅក្នុងគោលនយោបាយ និងកម្មវិធីរបស់ខ្លួន។ ក្រសួងទទួលខុសត្រូវ ក្នុងការពិនិត្យតាមដាន និងវាយតម្លៃគោលនយោបាយ និងកម្មវិធីនានា ដើម្បីប៉ាន់ប្រមាណ និងវាស់វែងអំពីការចូលរួមចំណែកធ្វើឱ្យសម្រេចបាននូវគោលដៅរបស់រាជរដ្ឋាភិបាល ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រីនៅកម្ពុជា។​ ចាប់តាំងពីឆ្នាំ១៩៩៩ ក្រសួងកិច្ចការនារី បានរៀបចំ និងអនុវត្តនូវផែនការយុទ្ធសាស្រ្តរយៈពេល៥ឆ្នាំ ដែលហៅថានារីរតនៈ។ នៅក្នុងឆ្នាំ២០១៣ ក្រសួងកិច្ចការនារីក្នុងភាពជាដៃគូជាមួយក្រសួង ស្ថាប័ននៅថ្នាក់ជាតិ និងក្រោមជាតិ បានពិនិត្យលើប្រសិទ្ធភាព និងភាពស័ក្តិសិទ្ធិ នៃការអនុវត្តផែនការយុទ្ធសាស្រ្តនារីរតនៈ និងបានរៀបចំផែនការយុទ្ធសាស្ត្រនារីរតនៈ ដែលជាផ្នែកមួយសំខាន់នៃការអនុវត្តយុទ្ធសាស្ត្រចតុកោណដើម្បីកំណើន ការងារ សមធម៌ និងប្រសិទ្ធភាពនៅប្រទេសកម្ពុជា។