Mealawo

MEALAWO do lafzon se bana hai. Meal, yani khana. Aur Lawo, jo Gujrati mein laane ko kehte hain, magar izzat ke sath. Urdu mein us ki jagah hum “laain” kehte hain, “laao” nahi.
Ye chhota sa farq hi asal baat hai. Meal Laiyay mein hukum nahi, guzarish hai. Aur jo brand ghar ki khawateen ki izzat ki kamai par khara ho, us ka naam bhi izzat wala hi hona chahiye tha.
Jab bhookh lagti hai to sabar nahi hota. Dukan chhor kar khane ja nahi sakte, ghar se roz tiffin la nahi sakte, aur bazaar ka khana roz roz na jaib sehti hai na sehat. Wahin MEALAWO kaam aata hai.
Hamara khana kisi bade commercial kitchen mein nahi banta. Wo un ghar ki khawateen ke haathon banta hai jo apne pakane ke hunar se izzat ki rozi kamana chahti hain. Aur wo naujawan ise pohanchate hain jo part time kaam karke apna kharcha nikalna chahte hain.
Aik plate khane ke peeche do ghar chalte hain.
Ye sirf khana bechne ka kaam nahi hai. Har box teen logon ko jorta hai, aur teenon ka faida hota hai. Yehi hamari poori soch hai.