款款而行文化工作室

我是楊惠萍，遮是款款而行文化工作室，愛聽故事的小朋友、大朋友，逐家好！2025年1月4日款款而行文化工作室(00817507)正式開業。我佮我的翁婿黃宗修佇咧經歷十一年婚姻生活的共同磨鍊、探索、確認了後。佇2024年年底共高雄市政府經濟發展局申請行號設立，這一年的12月10日受著核准。阮向望實踐石雕創作、做實木傢俱、炒焙咖啡豆、講故事、唱囡仔歌、吟詠古典詩詞、唱誦華嚴四十二字母佮讀誦華嚴經的生活，毌但做家己想欲做的代誌而且會用得做共食穿無煩惱，嘛會用得一點一滴分享阮踏實佇咧實踐的生活理念共文化。
以下的文字是進前寫的，我想欲留落來，記錄家己所行過的路。
逐家好，遮是楊惠萍音聲工作室的YouTube頻道。我名叫楊惠萍，是臺灣屏東外海小琉球島大漢的囡仔。2021年10月4日，我開始學習運用YouTube的頻道，結合我天生的發聲能力共我愛講故事、愛唱歌、愛吟詩和愛讀經的興趣，希望做我想欲做的代誌，慢慢慢慢會當做甲自食其力的程度。