Kalam Kaviyam

டாக்டர் அப்துல்   கலாமின் வாழ்க்கை சரித்திரத்தை ஒரு காவியமாக எழுதவேண்டும் என்கிற கனவு நீண்டகாலமாகவே என்னைத் தொடர்ந்து வந்த கனவு! அவர் வாழும் காலத்தில் அது நிறைவேறாமல் போய்விட்டாலும் கலாமைப்பற்றிய எண்ணங்கள் விதைகளாக எனக்குள் வாழ்ந்தன. அந்த எண்ணங்கள் எல்லாம் மரமாக வளர்ந்து கவிதைப் பூக்களாக இங்கு விரிகின்றன. ஆம் அப்துல் கலாம் காலத்தால் அழியாத காவியம். எனவே, நான் எழுதிய கலாமின் வாழ்க்கை கவிதைக்கு ‘கலாம் காவியம்’ என்ற தலையங்கம் கொடுத்தேன். இது அழியாத காவியமாய் நின்று நிலைக்கும்! உலகம் உள்ளவரை நிற்கும்! 

உலகில் எத்தனையோ பேர் பிறக்கிறார்கள்! வாழ்கிறார்கள்! மறைகிறார்கள்! ஆனால் சிலபேர் மட்டுமே பூமியில் தடம் பதித்தும் மக்கள் மனதில் நீங்கா இடம் பிடித்தும் செல்கிறார்கள். கலாம்! காலம் கொடுத்த அருட்கொடை. இவர் காலத்தால் அழியாத காவியம்.  கலாம் என்னும் நட்சத்திரம் மண்ணிலே உதிர்ந்த நாளில் ‘கலாம் காவியம்’ ஒரு கருவாக எனக்குள் உருவானது. அதன் உற்பத்திகாலத்தில் ஒரு நாள் ஒரு கவிதை என்கிற கணக்கில் எழுதப்பட்டு 7500   வரிகளையும் தாண்டி கலாம் ‘காவியம்’ என்கிற படைப்பாக தமிழ் மண்ணிலே புதிதாகப் பிறந்திருக்கிறது.