អគ្គាធិការដ្ឋានពុទ្ធិកសិក្សាជាតិ

ព្រះពុទ្ធសាសនាបានចាក់ឫសយ៉ាងជ្រៅ និងមានសក្តានុពលបំផុតក្នុងសង្គមខ្មែរ ហើយបានដើរតួយ៉ាងសំខាន់ក្នុងការអប់រំចំណេះដឹង និងសីលធម៌រស់នៅយ៉ាងទូលំទូលាយនៅក្នុងព្រះរាជាណាចក្រកម្ពុជា។ ដើម្បីផ្សព្វផ្សាយ និងអភិវឌ្ឍទ្រឹស្តីព្រះពុទ្ធសាសនាឱ្យសុះសាយ ដល់សាធារណជនបានសិក្សារៀនសូត្រ និងស្វែងយល់កាន់តែច្បាស់ នៅដើមសតវត្សទី១៩ បោរាណ-បណ្ឌិត ថ្នាក់ដឹកនាំ និងពុទ្ធបរិស័ទខ្មែរ បានផ្តួចផ្តើមបង្កើតគ្រឹះស្ថានពុទ្ធិកសិក្សាជាផ្លូវការ។ ក្រោយពីពុទ្ធិកសិក្សាបានចាប់បដិសន្ធិឡើង និងមានស្ថិរភាពរឹងមាំក្នុងការបណ្តុះបណ្តាល ធ្វើឱ្យព្រះពុទ្ធសាសនានៅក្នុងព្រះរាជាណាចក្រកម្ពុជា មានការរីកចម្រើន និងមានព្រះសង្ឃទាំងឡាយ មានចំណេះដឹង ជំនាញ ក្លាយជាអ្នកប្រាជ្ញ បណ្ឌិត បញ្ញវន្ត និងសាស្ត្រាចារ្យជាដើម ល្បីខ្ទរខ្ទារនៅក្នុងតំបន់អាស៊ីអាគ្នេយ៍ និងពិភពលោកផងដែរ។ ភាពរុងរឿងទាំងអម្បាលនោះ បន្តដំណើរលិចអណ្តែតៗ រហូតឈានមកដល់ សម័យកាលដ៏ខ្មៅងងឹតមួយ ដែលវិស័យពុទ្ធិកសិក្សាទូទាំងប្រទេសត្រូវបានបិទទ្វារមិនដំណើរការទាំងស្រុង ក្នុងអំឡុងឆ្នាំ១៩៧៥-១៩៧៩ គឺក្នុងរបប "កម្ពុជាប្រជាធិបតេយ្យ" ដែលដឹកនាំដោយមេផ្តាច់ការ "សាឡុត ស ហៅ ប៉ុល ពត" ។