 ጤናን በዘዴTenan Bezede

አላማችን የማህበረሰብ ጤናን በሚመለከት ቅድሚያና ትኩረት ሊሰጣቸው ስለሚገቡ ሁኔታዎች ትክክለኛና ጠቃሚ መረጃን ማካፈል ነው። ምንም እንኳን ጤናን በተመለከተ ጠለቅ ያለ እውቀት ሊኖረው የሚገባው የጤና ባለሞያው ቢሆንም፣ ጤንነትን በተመለከተ መሰረታዊ እውቀትን ማዳበር የሁላችንም ሃላፊነት ነው ። ይህ ደግሞ  በታመምን ጊዜ ብቻ  ሳይሆን  ጤነታችንንም  በሚገባ ለመንከባከብ፣ ለበሽታ የሚያጋልጡ  ሁኔታዎችን ለይቶ ለማወቅና ከነዚህ ለመራቅም መሰረታዊ የጤና እውቀታችንን ማዳበር የሁላችንም ሃላፊነት ነው። 
ጤንነታችንን በተመለከተ ሊኖረን የሚገባ መሰረታዊ እውቀት ( Health Literacy) ምንድን ነው?
መሰረታዊው የጤና እውቀት ወይም  በእንግሊዝኛ ቋንቋ Health Literacy የሚባለው ሲሆን ይህም
ሰዎች ጤንነታቸውን ለመንከባከብም ሆነ ሲታመሙም ትክክለኛ መረጃ መሻት እንደሚገባቸው መገንዘብ፣ ያልተዛባ የመረጃን ምንጭ ማወቅ፣ ያልተዛባ መረጃ ላይ የተመረኮዘ ወቅቱን የጠበቀ መፍትሄ መሻትና በስራ ላይ ማዋልን የሚያመልክት ነው።
በምርምር ጥናት ላይ የተደገፉ የተለያዩ  መረጃዎች እንደሚያመለክቱት የዳበረ መሰረታዊ የጤና እውቀት ያላቸው ስዎች ለህመም የመጋለጥ ሁኔታቸው ዝቅ ያለና ሲታመሙም በፍጥነት የማገገም ችሎታቸው ከፍ ያለ እንደሚሆን ያመለክታል፣ በተጨማሪም የመሰረታዊ እውቀት መዳበር የተዛቡ የጤና መረጃ ምንጮችን ለይቶ ለማውቅም ስለሚረዳ የተዛባ መረጃን በመጠቀም በምንወስደው እርምጃ ከሚደርስብን ጉዳት ልንከላከል እንችላለን።
ቀደም ብየ እንደጠቀስኩት የዝግጅታችን ዋና አላማ የማህበረሰባችንን መሰረታዊ የጤና እውቀትን ለማዳበርና ወሳኝ በሆኑ የማህበረሰብ ጤናን የሚመለከቱ ጉዳዮችን መረጃ ላይ የተመረዙ ጉዳዮችን አስመልክተን ለመወያየት ነው።