أيوه ... أنا هوه
أنا الأفندي اللي قفلوله البروفايل بتاعه قبل كده

قفلوه لسبب وجيه جداااااااً
إني كنت رافع لقطات مسجلها من قنوات مشفرة و عليها علامة الشركة صاحبة القنوات
شفتوا بقى ازاي

لسة زي ما أنا
لسة ما حرمتش
لسة بحب مصر .. لسة مش عارف أكرهها
لسة بحب كل الناس .. و مش عارف أكره حد
لسة عندي أمل كبير .. أكبر من الحياة نفسها
لسه عايز أقول حاجات كتير قوي

و على رأي أستاذنا صلاح جاهين ربنا يرحمه

إقلع غماك يا طور .. و ارفض تلف
كسر تروس الساقية .. و اشتم و تف
قال : بس خطوة كمان .. و خطوة كمان
يا اوصل نهاية السكة .. يا البير يجف
وعجبي

أنا الأفندي اللي مش عارف يكره مصر
أنا اللي شفت فيها أيام كلها حلوة

أنا اللي اتربيت فيها و مشيت في شوارعها
و أكلت على عربيات الفول و الكشري و الكبدة
و شربت سوبيا و عرقسوس و عصير قصب و خروب

و اتمشيت على الكورنيش و اكلت درة مشوي و ترمس
و اتشعبطت على سلم الأتوبيس و المترو و قطر شبين
و قعدت في الدرجة التالتة في الاستاد في عز الحر

و لفيتها من فوق لتحت وعرفت قد ايه البلد دي غالية عند الناس كلها

اتجوزت و خلفت فيها و عيالي بقوا رجالة

و نفسي أسيب لهم مصر الحلوة اللي أنا أعرفها

فيها حاجة دي يا جدعان