In nomine Patris, et Filii, et Spiritus Sancti. Amen.

Orate fratres Deum pro Pontiffice Maximo Benedicto, pro exaltatione Sanctae Ecclesiae ac haeresum extirpatione, pro nationum concordia, pro principibus christianis, pro tranquilitate populorum, ut omnes una aeternis gaudiis tandem perfruamur.

Tu es Domine gloria mea, tu exaltas caput meum.

In te speraverunt patres nostri, speraverunt et liberasti eos.

Ad te clamaverunt et salvi facti
sunt in te speraverunt et non sunt confusi.

Quoniam tu es qui extraxisti me de ventre spes mea ab uberibus matris meae.

Dirige me in veritatem tuam et doce me quoniam tu es Deus salvator meus et te sustinui tota die.

Respice in me et miserere mei quia unicus et pauper sum ego.

Delicta iuventutis meae et ignorantias meas ne memineris secundum misericordiam tuam memento mei tu propter bonitatem tuam Domine.

Tibi dixit cor meum exquisivit facies mea faciem tuam Domine requiram.

Narrabo nomen tuum fratribus meis in media ecclesia laudabo te.

Ineffabilem nobis Domine misericordiam tuam clementer ostende: ut simul nos et a peccatis omnibus exuas, et a poenis, quas pro his meremur, eripias.

Ure igne Sancti Spiritus renes nostros, et cor nostrum Domine: ut tibi casto corpore serviamus, et mundo corde placeamus.

Actiones nostras quaesumus Domine aspirando praeveni, et adiuvando prosequere: ut cuncta nostra oratio, et operatio a te semper incipiat, et per te coepta finiatur.

Dominus virtutem populo suo dabit
Dominus benedicet populo suo in pace.

Custodi nos Domine ut pupilam oculi sub umbra alarum tuarum protege nos.

Gloria Patri, et Filio, et Spiritui Sancto. Sicut erat in principio, et nunc, et semper, et in saecula saeculorum. Amen.