Kape't Pandasal (love one another)

March 14 (Ang kabutihan sa kapwa ay kailan ma'y di matatawaran.)

Magandang umaga po. Ako po si Bro Ernald, ang inyong muling makakasalo upang mag Kape't Pandasal. Ngayong panahon ng kuwaresma, marami na tayong mga kinaugaliang paraan ng pagsasakripisyo at pagtitika. Tunay nga naman pong nakabubuti iyan sa ating paghahanda sa biyaya ng muling pagkabuhay. Subalit, alam din po nating hindi lamang ang pagpapabuti ng ating sarili ang dapat nating pinagkakaabalahan. Naririyan din ang ating kapwang dapat pinaglilingkuran.

Sabi nga po ng Panginoon sa ebanghelyo, "Anuman ang ginawa ninyo sa isa sa pinakamaliit na kapatid ko, ginawa ninyo ito sa akin." Ang ating mga kababayan na naghihirap ay hindi nangangailangan ng awa kundi ng nararapat na hustisya. Kung tayo man ay namamasukan sa kumpanya o pamahalaan, tinitiyak ba nating tapat at patas ang ating pamamaraan? Kung tayo ay estudyante't nag-aaral, nagsusumikap ba tayong pagbutihin ang sariling kakayanan at umiiwas sa kalokohan? Ang kabutihan sa kapwa ay kailan ma'y di matatawaran.

Kung naiisip natin kung minsan na ang pagtataguyod ng isang lipunang makatarungan ay hindi kailan man mararatnan, subukan po muna nating gumawa ng munting kabutihan sa ating kapwa. Sa ganoong paraan, ang ating pananampalataya ay maging daan upang ang hustisyang inaasam-asam ay maisakatuparan. Huwag nating kalilimutan, ang bilin sa atin ng Panginoon: kayo ay mag-ibigan sa isa't isa. Kung papaanong inibig ko kayo ay gayundin naman kayong mag-ibigan sa isa't isa. Amen.

Category:

People & Blogs

Tags:

• Ernald
• Andal
• Jesuits
• SLB
• Simbahang
• Lingkod
• ng
• Bayan
• JesCom
• Leap
• Year
• Kape
• Pandasal
• Abercrombie
• orange
• SHS-J
• xavier