BUS CHIKI-OUMENTO TARIFA

Despues ku e sindikato STU a ekspresá su deseo na gobièrnu indikando ku gastunan di kombustibel a subi di forma drástiko, Bestuurscollege a disidí honra nan petishon i bai di akuerdo ku un adaptashon di tarifa. A base di varios dato i usando un sistema profeshonal pa kalkulá tipo di kos asina, gobièrnu a disidí lo sigiente:
pa karedanan entre 5'or di mardugá i 8'or di anochi e tarifa lo subi ku 20 sèn pa promé distrikto, esta stad. E tarifa nobo ta bira e ora ei Fl. 1.50.
Di stad pa segundo distrikto e tarifa ta subi ku 25 sèn i bira Fl. 1.80.
Di stad pa di tres distrikto e tarifa ta subi ku 40 sèn i bira Fl. 2.95.
Pa e sobrá oranan di dia, esta entre 8'or di anochi i 5'or di mardugá di e sigiente dia, tambe e tarifanan ta subi dependiendo di unda e pasahero ta sali i unda e ta bai. Esakinan a keda adaptá prosentualmente.
Den un komunikado, gobièrnu di Kòrsou ta informá ku e ta konsiente dje importansha di busnan chikí komo medio di transporte pa un gran kantidat di siudadano. P'esei e ta spera k'e adaptashon di un banda ta yuda e shòfur di bus chikí pa por kubri su gastunan. Di otro banda e ta spera k'e poblashon ta sigui hasi uso di bus chikí manera a bin ta sosodé pa hopi aña kaba.

Category:

News & Politics

Tags:

• telecuracao
• telenotisia
• curacao
• korsou
• notisia