Y miliynfed ymwelydd â'r Senedd

www.cynulliadcymru.org

Mae'r Senedd, sef cartref Cynulliad Cenedlaethol Cymru wedi croesawu ei miliynfed ymwelydd.

Cyfarchwyd Samantha Hailes o Caerdydd gan Rosemary Butler AC, Llywydd y Cynulliad, a chafodd dystysgrif a thaith o amgylch yr adeilad.

"Roeddwn yn hynod o falch o groesawu Samantha fel y miliynfed ymwelydd â'r Senedd," dywedodd Rosemary Butler.

"Ers ei hagor chwe blynedd yn ôl, mae'r Senedd wedi bod yn adeilad eiconig sy'n denu ymwelwyr ac edmygwyr o bob rhan o'r byd.

"Mae hygyrchedd, tryloywder a chynaliadwyedd wrth galon yr adeilad.

"Mae'r tair egwyddor hon wedi'u gweu i mewn i ddeunydd yr adeilad yn yr un modd ag y maent wedi'u gweu i mewn i waith y Cynulliad Cenedlaethol wrth gynrychioli pobl Cymru."

Mae'r Senedd, a gafodd ei hagor yn swyddogol gan EM y Frenhines ar Ddydd Gŵyl Dewi 2006, yn un o adeiladau trawiadol datblygiad Bae Caerdydd ac mae'n adnabyddus ledled y byd.

Cafodd yr adeilad ei ddylunio gan benseiri Rogers Stirk Harbour and Partners gyda'r bwriad o fod yn dryloyw a hygyrch i'r cyhoedd ond hefyd i fod yn un o adeiladau seneddol mwyaf ystyriol i'r amgylchedd yn y byd.

Category:

News & Politics

Tags:

• Senedd
• miliynfed
• ymwelydd
• democratiaeth
• cynulliad
• twristiaeth
• atyniad