AKSIDENTENAN RIBA RUTA KARNAVAL.

Kaya a bira masha drùk mes den kareda di mitar di kuater, mei ora promé ku ofisialmente por a kuminsá pone stul i harma stèlashi kantu dje ruta di karnaval. Hopi hende tabata kore wak otro pega kos kantu di kaya i den esaki nan tabata kore slow i okashoná fila. Na altura di Marchena un outo a dal tras di un pikòp ku tabata kore su dilanti ku konsekuensha ku shòfùr dje vehikulo aki a sufri leshon. E tabata keha di doló na garganta i ku ambulans a transport'é pa Poliklinika kaminda ela risibí tratamentu médiko. Djis un ratu despues tabatin un dalmentu na altura di Scheidelaar, djis enfrente di Moskee, kaminda tambe hendenan tabata pone stul i traha riba stèlashi kantu dje ruta di karnaval. Den e kaso ningun persona a resultá heridá. Mas pabou, riba Frater Radulphusweg, e kaya ku ta konektá Weg naar Welgelegen ku Nijlweg, tabatin dalmentu entre un outo i un pikòp. Akinan ta CRS mes a atendé ku e aksidente ya ku no a registrá herido. TeleNotisia ta komprondé ku riba e ruta di karnaval tin hopi ambiente awor ku por pone stul i stelashi pero ta urgi outomobilistanan pa paga bon tinu riba kaya. Tin mas hende ta kana bai bin i krusa kaya mièntras ku hopi shòfur ta kore slow, pues ta motibu pa ta èkstra alerta e dianan aki riba Rooseveltweg, Weg naar Welegelegen i Roodeweg.

Category:

News & Politics

Tags:

• telenotisia
• telecuracao
• notisia