Peire Cardenal: Un sirventese novel

De sirventes sueilh servir
sai sus on eron volgut,
don ei mans vils vols tolgut
per far fals fatz escarnir
e qes hom ves valor vir;
e si per so plai als pros
pro m'es pros,
qar totztemps desir
q'om pros m'am qui que m'azir

 
En fers fatz fai afortir
le mons sels que i son nascut,
qe qan an queacom viscut
quecx fai qe croi[s] a murtrir,
ab tort far et ab mentir,
q'en mil milliers no·n a dos
q'ab dreitz dos
vuelhan avenir
lai ont hom dous deu venir.

E qan vida˙ill vol failhir
cuia far vera vertut
qan ditz qe siei aver tut
sion dat al sebelir,
q'estiers no·l pot abelir
donars, tan es cobeitos
e coitos
d'aver aculhir
tro mortz vai lui reculhir.

Dieus deu als baros grazir
qar ves lui son sort e mut,
qe·ll luec on fom rezemut
no volun tan possezir
qon l'autrui terra sazir,
e non crei qe·l reis n'Anfos
aitals fos,
anz volc envazir
turcs per crestianz aizir.

Malvestat vei espandir
ves totas partz a sauput,
qe·l mon a tant corrumput
qe gaire non es a dir;
qar qi o osava dir,
nier e blanc e brun e ros
an tan ros
qe qan los remir
dolors m'en ven aramir.

Un non trueb en mil garsos
que gar sos,
anz volun bordir
de cansos falabordir.

Trobadors
Capella de Ministrers
Carles Magraner

Category:

Music

Tags:

• Peire
• Cardenal:
• Un
• sirventese
• novel

[oconselhodanuvem]

lindo! *-*