Christine de Pisan - Seulete suis (Lucie de Vienne Blanc)

Christine de Pisan - Seulete suis

Récitation de Lucie de Vienne Blanc

I.
Seulete sui et seulete vueil estre,
Seulete m'a mon douz ami laissiee;
Seulete sui, sanz compaignon ne maistre,
Seulete sui, dolente et courrouciee,
Seulete sui, en langueur mesaisiee,
Seulete sui, plus que nulle esgaree,
Seulete sui, sanz ami demouree.

II.
Seulete suis a uis ou a fenestre,
Seulete sui en un anglet muciee,
Seulete sui pour moi de pleurs repaistre,
Seulete sui, dolente ou apaisiee;
Seulete sui, riens n'est qui tant messiee;
Seulete sui en ma chambre enserree,
Seulete suis, sanz ami demouree.

III.
Seulete sui partout et en tout estre;
Seulete sui, ou je voise ou je siee;
Seulete sui plus qu'autre riens terrestre,
Seulete sui, de chascun delaissiee,
Seulete sui, durement abaissiee,
Seulete sui, souvent toute esplouree,
Seulete sui, sanz ami demouree.

Envoi :
Princes, or est ma douleur commenciee:
Seulete sui, de tout dueil menaciee,
Seulete sui, plus teinte que moree:
Seulete sui, sanz ami demouree.

Category:

Education

Tags:

• christine
• de
• pisan
• seulete
• suis
• poésie
• médiévale