Rolda de prensa sobre os orzamentos 2011

O ORZAMENTO DE NARÓN FOI DITAMINADO FAVORÁBELMENTE SEN O APOIO DO BNG

A abstención do PSOE ao respecto das contas: manifestación dun posíbel acordo desta formación con Terra Galega.

Narón, 28 de decembro de 2010.- a sesión extraordinaria da Comisión Informativa de Contratación, Persoal e Especial de Contas era o escenario do ditame favorábel ao orzamento municipal de Narón para o 2011 motivado pola abstención do PSOE.

Pablo Villamar, vicepresidente da Deputación da Coruña e portavoz do BNG en Narón, comparecía diante dos medios de comunicación para comunicar o voto desfavorábel do BNG ao documento de ingresos e gastos: "finalmente non foi posíbel o apoio do BNG. Dende un principio puxemos enriba da mesa uns mínimos que non foron tidos en conta polo que o noso voto foi contrario ao documento"- lamentaba o portavoz frontista- "hoxe asistimos á manifestación da alianza entre TEGA e PSOE"- sentenciaba Villamar, defendendo os motivos que levan ao Bloque Nacionalista Galego a non votar favorabelmente ás contas: "séguense a contemplar uns ingresos que non coinciden cos datos que nos temos"- dicía o vicepresidente da Deputación facendo referencia aos ingresos do estado e aos ingresos da Xunta- "finalmente redúcese un 32% o gasto en protocolo e publicidade que confirma o gasto excesivo que existía nesas partidas e que dende o BNG consideramos aínda susceptíbel de rebaixa. Ademais, existen partidas coma a dos bombeiros que sorprenden pola súa consignación"- exemplificaba Villamar, concluíndo a súa comparecencia aludindo novamente á falla de posibilidades para chegar a un acordo "a pesar de que dende o BNG falamos sempre con claridade, non foi posíbel convencer ao resto dos grupos para acadar un consenso. Ademais do pacto entre TEGA e PSOE, os que foron copartícipes da mala situación económica do concello, hoxe piden contas claras"- sentenciaba Villamar, facendo alusión á actitude dos populares.

Category:

News & Politics

Tags:

• concello
• narón
• orzamentos
• bng
• 2011
• pablo
• villamar
• municipal