La Prifazzioni di Lu quatru di Dorian Gray di Oscar Wilde (liggiuta 'n sicilianu di G. Coniglione)

L'artista è cui fa nàsciri cosi beddi.
Rivilari l'arti e ammucciari l'artista è lu fini di l'arti.
Lu crìticu è chiddu ca po' tradurri nti n'àutra forma o nu novu matiriali la sò pircizzioni di li cosi beddi.
La cchiù àuta comu la cchiù vascia forma di crìtica è na speci di autubiugrafìa. Chiddi c'attròvanu significati tinti nti li cosi beddi sunnu currumputi senza èssiri fascinusi.
Chista è na curpa.
Chiddi c'attròvanu beddi significati nti li cosi beddi sunnu li pirsuni culti. Pi chisti c'è spiranza. Iddi sunnu l'eletti ca li beddi cosi signìficanu sulu biddizza.
Nun cc'è libbru murali o immurali. Li libbra sunnu scrivuti boni, o scrivuti tinti. Chissu è tuttu.
La cuntraritati di lu diciannuvèsimu sèculu a lu rialisìmu è la raggia di Calibbanu ca vidi la sò stissa facci nti lu specchiu.
La cuntraritati di lu diciannuvèsimu sèculu a lu rumanticìsimu è la raggia di Calibbanu ca nun vidi la sò stissa facci nti lu specchiu.
La vita murali di l'omu è parti di lu suggettu di la materia di l'artista, ma la muralitati di l'arti cunzisti nti l'usu pirfettu di nu mezzu mpirfettu. Nun cci sunnu artisti ca vonnu pruvari qualegghié cosa. Mancu li cosi ca sunnu veri ponnu èssiri pruvati.
Nun cc'è n'artista ca havi ntenti murali.
Na simpatìa murali nti nu artista è nu ntentu stilìsticu ca nun si po' pirdunari.
Pinzeru e lingua sunnu pi l'artista strummenti di n'arti.
Vizziu e virtuti sunnu pi l'artista matiriali di n'arti.
Di lu puntu di viduta di la forma, lu mudellu di tutti l'arti è l'arti di lu musicista.
Di lu puntu di viduta di lu sintimentu, lu mudellu è la maistrìa di n'attori.
Tutta l'arti è a lu stissu tempu supirfici e sìmmulu.
Chiddi ca scìnninu sutta la supirfici lu fannu a sò pirìculu.
L'arti hà rispicchiari lu spittaturi, no la vita.
La divirsitati di l'upinioni supra n'òpira d'arti ammustra ca l'òpira è nova, cumpricata e vitali.
Putemu pirdunari a n'omu d'aviri fattu na cosa ùtili siddu nun cci piaci.
La sula scusa ppi aviri fattu na cosa nùtili è ca cci hà piàciri assai.
Tutta l'arti è tutta para nùtili.

(traduzzioni di Giuseppe Coniglione)

Category:

Education

Tags:

• Oscar
• Wilde
• Dorian
• Gray
• Giuseppe
• Coniglione
• sicilianu
• siciliano
• sicilian
• language
• sicilia
• sicily
• lingua
• siciliana