"COMPROMETIDOS CO CENTRO" Candidatura á Xunta Directiva do CGB

CANDIDATURA ENCABEZADA POR XOSÉ CONDE E XIANA DÍAZ ÁS ELECCIÓNS DO CENTRO GALEGO DE BARCELONA DE XANEIRO DE 2012
(carta dirixida aos socios e socias)
Benquerido socio,
Benquerida socia,
A candidatura que represento nace de dous debates abertos que tiveron lugar no Centro Galego durante o mes de novembro. Alí todos os socios tiveron a oportunidade de dar ideas para mellorar a xestión da nosa entidade e a maioría acabaron sendo incorporadas no programa electoral, xa que este nace dende a vontade do diálogo continuo cos socios.
UNHA CANDIDATURA DE CENTRO. A nosa candidatura é tamén a vosa, a voz dos socios, a candidatura do Centro. Pensamos que no Centro Galego non sobra ninguén, que cadaquén debe atopar o seu propio lugar para mellorar a nosa entidade.
RESPECTO POLA CULTURA TRADICIONAL. Todas as persoas que integran a candidatura están profundamente comprometidas co Centro. Moitas delas, a gran maioría, son ou foron membros dos grupos de música tradicional ou da propia Xunta Directiva, e outros son alumnos ou coordinadores dos talleres ou das actividades culturais que se realizan. Para nós, a cultura tradicional e en especial a súa música, é un dos piares básicos do Centro Galego, e así debe seguir sendo no futuro.
EXPERIENCIA. Moitos deles teñen unha ampla experiencia asociativa. Eu vinos traballar xenerosamente e sen ambicións personalistas, sacrificando gran parte do seu tempo para tirar adiante proxectos culturais relacionados con Galicia, xa sexa dentro do CGB ou fóra del. Proxectos coma a renovación da imaxe corporativa, o desenvolvemento da páxina web, a adaptación dos novos estatutos da entidade ou a xestión da maioría das actuacións de importantes artistas profesionais galegos, foron impulsados ou coordinados por algúns de nós.
COMPROMISO. O noso é un compromiso co diálogo, coa transparencia e coa honestidade. Respondo e responderei por esas calidades da candidatura que represento. A preparación e a experiencia son características dese equipo humano que quere loitar para que o CGB manteña e aumente o seu prestixio. Para iso, é necesario seguir profundando nas relacións institucionais conseguidas durante os últimos anos. Sei por experiencia propia o ben que é recibido o CGB nos despachos das institucións galegas e catalás e considero fundamental seguir traballando nesa liña para atinxir o máximo de recursos posible para o Centro.
Pero para non quedar atrás e estar á altura dos tempos, para construír entre todos o Centro Galego do s. XXI, precisamos da vosa confianza o próximo 28 de xaneiro. En espera de recibila e comezar a traballar intensamente para ter un Centro de todos e para todos, recibide un cordial saúdo.

Xosé Conde
Xaneiro de 2012

Category:

Education

Tags:

• CANDIDATURA