Kajjan Begum - Marsiya

Jab kat gaya Zahra ka chaman, dasht e bala meiN
Shamil hua pyasoN ka lahoo, Khaak e Shafa meiN

Koi na raha, fauj e Imam e Dosara meiN
Aur ghir gaya Haider ka pisar, ahle jafaa meiN

Teer aatey thEy har saf se Imam e azali par
Nau laakh ka nargha tha, Hussain Ibne Ali par

Hai shoar ke ab Naaeb e Haider ko na choaRo
Jeeta Pisar e Saaqiye Kausar ko na cHoaRo

Be barchiyaaN maare, Shah e Safdar ko na cHoaRo
Be zabha kiye, Sibt e Payamber ko na cHoaRo

Fatha, jo be sar pisar e Fatima ho jaaey
Jaldi yeh mohim sar ho, to bas khaatema ho jaaey

Gar tum meiN shuja'at hai, to himmat ko na haaro
Naizey, Pisar e Haider e Karraar ko maaro

Sayyed ka, Nabi Zaade ka sar, tann se utaaro
Farmaate haiN Shay kya meri taqseer hai, yaaro

Tanha hooN, musafir hooN, ghareebul ghoraba hooN
Raushan hai Khuda par, ke maiN be jurm o khata hooN

Hazrat ke sukhan sunke pukaare yeh jafakaar
Ab rahm kareiga na koi aap pa zinhaar

Chal jaaeiga iss halq pa, ab khanjare khooNkhaar
Baad iske luteiNge, Haram'e Ahmed'e Mukhtaar

NalaaN ho to ho rooh, Rasool e Do,sara ki
Utreigi rida, Bint e Shah e uqda kusha ki

Yeh sunke jo khamosh huey, Sibt e Payamber
Bas aa gaey khaiNche huEy, teighoN ko sitamgar

Ek khushk gala, aur kai sao, nayza o khanjar
Do laakh ka reila, aur akeila woh Dilaawar

TalwaaroN se majrooh, jo honEy lagey Maula
Khaime ki taraf deikh ke roane lagey Maula

Chillaey yeh Haider, ke hai aaNkhoN meiN andheira
Aey Fatima, batlaao kidhar laal hai meira

KhooNkhaaroN ne kis ja mere Ma'soom ko gheira
Khanjar to nahiN, halq pa jalladoN ne pheira

ChillaiiN ke duniya se Pisar jaata hai Saheb
Khanjar ko liye, Shimr cHala aata hai Saheb

Yeh kah ke cHaliiN khaime se, Zainab jo khuley sar
Deikha ke taDapta hai, tan e Sibt e Payamber

Aur Shimr liye jaata hai, Shah ka Sar e Anwar
Ek haath meiN, geisu haiN aur ek haath meiN khanjar

PurGard haiN rukhsaar, Shah e tashna guloo ke
Qatrey rag e gardan se, tapakte haiN lahoo ke

Yeh gul sa badan, auur yeh zakhm e tabar o teer
Lagti hai kabhi seene pa barchi, kabhi shamsheer

Seene pa jhuka jaata hai sar, haal hai ta'ghiir
Duniya meiN koi damm ka hai mehmaaN, mera Shabbir

Har zakhm se fawwaraey khooN, cHooT rahey haiN
Hai hai, meri daulat ko shaqi, loot rahey haiN

Jab kat gaya Zahra ka cHaman, dasht e bala meiN!

Category:

Education

Tags:

• kajjan
• begum
• marsia
• naat
• soz
• salam
• naoha
• mirza
• jamal
• mahakavi

[sqa452]

An excellent mersia - read in an excellent manner. jazak Allah Kajjan Bagum, Allah aap kay darakaat main izafa fermai, Amin.

[mahakavi]

@sqa452

Aameen

[smsz1]

astounding and staggering

[sakkibaba]

Allah jannat naseeb karey jis azeem shayar ne likha hai..aur jisne padha hai..aur jisne upload kiya hai....salamat raho bhai...ye marsiye ki meraaj hai..

[hasni437]

Jazak Allah

[dilbaajaan]

MASHALLAH...........MOLA SALAMAT RAKHE

[MrStinkyfeets]

thnaks

[rohiabbas1]

masha Allah,