Bo reflexion den un otro dimension

This poem entitled "Bo reflexion den un otro dimension" features in Rosabelle Illes' second book of poetry entitled "Spiel di mi Alma"

E poesia titula "Bo reflexion den un otro dimension" ta saca for di Rosabelle Illes su segundo buki di poesia titula "Spiel di mi Alma"


Bo reflexion den un otro dimension

Bo reflexion den un otro dimension
Bo no a yega di puntra bo mes dicon?
Dicon ami, dicon e, dicon abo
den e situacion
Un situacion fastioso, un situacion doloroso,
un situacion cu ta pone bo mes puntra ta dicon!
Ta e reflexion di unda nos ta awor
Como sernan humano, como amigo y amiga pero no famia
Como famia pero no parti di nos bida
no como un pida di loke ta forma anos
ami, abo y e
den e situacion
Un situacion di goso, un situacion amoroso,
un situacion cu ta pone bo mes puntra ta dicon!
Dicon anos y no anan?
Ta e reflexion di unda nos ta awor
Ta e balor di e individuo ... y e speransa di e duo
Transformacion disfrasa den bo reflexion
paso nan sa unda abo ta, den bo estado simpel
Cambio y inspiracion ta aparece den bo reflexion
paso nan sa di e situacion
Nan sa di e momentonan crucial,
ora abo ta haci e pregunta, e pregunta cardinal
E contesta ta rekeri esfuerso
pero nan t'ey
Nan ta presente den bo accion di simplesa
Permiti nan di ta un guia,
un punto di bista
un señal di transformacion, cambio y inspiracion
Bo reflexion den un otro dimension.

© Rosabelle Illes, 2010

Category:

Education

Tags:

• Orbs
• Rosabelle Illes
• Love and Light Aruba
• Poetry
• Love & Light Foundation
• Robin de Vogel