Movimentando.of. Exposición comisariada por Vítor Nieves para o Outono Fotográfico

Neste anaco do Rompecabezas, o programa cultural de Telemiño, vemos a Vítor Nieves falando de Movimentando.of, da que é comisario.

Movimentando.of inaugurouse na Casa da Xuventude de Ourense no marco do Outono Fotográfico (OF) ocupando a Sala Escaparte xunto cunha nova sala interior habilitada en exclusiva para a ocasión. O coordinador do festival, Xosé Lois Vázquez (Che) e o comisario da mostra, Vítor Nieves, foron os encargados de darlle apertura.

Esta nova exposición leva o selo de Lois Patiño, Bernado Tejeda, Amaya González Reyes, Álvaro Negro, Pablo Barreiro, Carla Vijande del Río, José Romay e Carlota Salgado, todos eles traballadores incansables da arte e experimentadores da fotografía.

Movimentando.of é unha experiencia do OF na procura de novos diálogos. É unha porta que se entreabre ao movemento sen perder o estatismo, esta nova mostra creada por Vítor Nieves para o festival fotográfico pretende amosar ese lado da videocreación máis próximo á fotografía, se é que algún está lonxano.

Con esta teima o comisario foi procurando os e as artistas participantes para conseguir pezas de vídeo case fotográficas tanto na forma coma no fondo. Na forma: ben sexa porque á hora da produción se empregaron cámaras fotográficas, porque na editaxe intervía dalgún xeito a fotografía, ou porque, por seren artistas arrastrados da disciplina fotográfica, empregan unha mirada no vídeo onde o estatismo, o encuadre, o punto de vista, a distancia focal, o espazo e o tempo toman unha particular relevancia que non é moi común no eido do videoarte.

E tamén no fondo xa que as oito pezas que conforman a mostra, pese a ser de moi diferente natureza e condición, todas elas redundan as ideas que historicamente traballou o medio que homenaxea o OF. Así fanse presentes temas moi recorridos na fotografía como a memoria ou a documentación.

Movimentando.of sae adiante xunto co centenar de exposicións que configuran o programa do OF pese a todos os obstáculos que este ano tivo que esquivar o festival. Desde que o seu admirable creador Benito Losada finara no pasado ano, moitas foron as páxinas que se escribiron para augurar un ou outro futuro. Esta 29ª edición ven demostrar que é un evento que conta cunha boa saúde, pero sobre todo que Benito foi quen de tecer unha inmensa rede de fotógrafos e fotógrafas, galeristas, curadores, e seguidores en xeral, que foron os que realmente puideron artellar o presente OF baixo a grande labor de coordenación de Xosé Lois Vázquez, pois se Ourense tivera que agardar polas mans tendidas de fóra ou da administración galega quizáis estariamos agora a debatir nun cambio de nome para chamarlle Inverno Fotográfico, no seu máis poético senso.

Category:

People & Blogs

Tags:

• Movimentando
• movimentando.of
• outono
• fotográfico
• benito
• losada
• xose lois vazquez
• che
• Vítor Nieves
• comisario
• comisariado
• curator
• curador
• Lois Patiño
• Bernado Tejeda
• Amaya González Reyes
• Álvaro Negro
• Pablo Barreiro
• Carla Vijande del Río
• José Romay
• Carlota Salgado
• Rompecabezas
• telemiño
• cultura
• arte
• Ourense
• O Barco
• Valdeorras
• videoart
• videoarte
• videocreacións
• videocreaciones
• fotografía
• exposición
• festival
• tendencias