HMAR RAM - MIZO UNION MOVEMENT 1946 -1951 : Part 7

HMAR RAM - MIZO UNION MOVEMENT 1946 -1951 Part 7

Mizo Union Movement: 1946 - HMARRAM -1951

Manipur Hmarho chu Mizo Union an ruichil em a Vangin Manipur Hmar biala Meitei Sikul zawng zawng an Manipur Subject la lo turin an lo ti buai a. "Mizo sikul lo chu kan duh lo," tiin Manipur sawrkar chu an hnawl bawk a. Tuna Mizoram chhunga awmte chu Lal pawl leh Union (Zalen) pawl tia khuangpui nena kan innawr mai mai lai kha, Manipur-a Hmar-ho chuan Manipur Sawrkar leh Assam Rifle tharumin an lo nawr a ni a. An hotute jail tang pawhin, "Mizo chaaw lo chu kan ei dawn lo," an ti ngat mai a ni. An Mizo Union avanga Mizo Sawrkar lo piang ur an beiseinate leh state thuneihna an dozia hetiang hian an phuah a:

State thuneihna bo a ta,
Mizo sawrkar la ngir a tih;
Lenruol dit ei chi ei hnamhai leh,
Sappui nun ngai lova ei lengna ding.

A awmzia chu-

"State thuneihna a ral ang a,
Mizo Sawrkar a la ding ang;
Lenrual duh le kan chi leh hnamte ne'n,
Sappui nun ngai lova kan lenna tur."

tina a nih.

Chuti fakauava Mizo Union an ruihchilh avang chuan, 1949-ah Manipur Lal ber P.B Singh-an, Hmar-ho chu an zu thlem a. "Mizo Union tawpsan ula, ram duh in nih chuan, nangmahni pualin District Council ka pe ang che u. A ramri tur pawh a fel sa vek, Tuizang atangin Jiribam thleng a ni ang," a tih a. Chutah chuan, kan lo pawm mai dawn nge tiin Aizawl lam Mizo Union hotute an va rawn a. Pu Thanhlira te, Pu H.K Bawichhuaka te Aizawl atanga va kalin, "In lo pawm mai nang Mizo sawrkar a piang tep tawh a lawm," an lo ti a. Lo tawp phawt se....

Category:

News & Politics

Tags:

• Hmar
• Mizo
• Assam
• Manipur
• Mizoram
• Union