'Na volta me ricordo

'Na volta me ricordo
no gera rose e fiori
ma almanco i cantieri
ne dava da lavorar

I turni la sirena
i colpi de marteo
faseva un bel bordeo
po' tuto s'à fermà

Se ga fermà i reogi
se ga fermà i lavori
fora dai cantieri
fora i ne ga mandà

Se 'ndava a la Giudeca
a lavorar da Stuky
e dopo tanti sachi
i ne ga licensià

Barconi caricava
montagne de farina
i galegiava apena
bianchi come el pan

I silos gera pieni
de gran salo e maturo
Stuky pien de oro!
i ne lo ga svodà

E anca a Dorsoduro
co' 'n altro maleficio
bondì cotonificio
i ne lo ga serà

Gavevimo i teeri
coton per far la stofa
adeso femo la mufa
senza più lavorar

I ne ga dito done
ste' casa a far i fioi
l'omo porta i schei
no' steve lamentar

Semo de Canaregio
ne toca de 'ndar fora
magari a Marghera
a farse infumegar

Un popolo de bando
xe fiapo e avilio
che musi a Castelo
xe ora de cambiar

Cambiemo che xe ora
metemose de sesto
femo femo presto
salvemo 'sta cità

Category:

Music

Tags:

• Canzoniere popolar veneto
• Luisa Ronchini
• Alberto D'Amico