MOBI-BIK EGUNA Zarautzen abenduaren 20an

Aspanovas Elkarteak (Gipuzkoako Haur Minbizidunen Gurasoen Elkarteak) MOBI-BIK EGUNA antolatu du Markel Irizar, Joseba eta Haimar Zubeldia txirrindulariekin eta pailazookin batera, Zarautzen, abenduaren 20rako, Zarauzko Udalaren laguntzaz eta hainbat kirol eta kultur mailako elkarte eta banakoren babes eta partehartzeaz.

Atzo festa egunaren aukezpenean elkartu ginen Aspanovaseko lagunak, Imanol Lasa (Zarauzko Turismo zinegotzia), Arritxu Iribar (Euskadi Irratiko kiroletako kazetaria), Markel Irizar eta Haimar Zubeldia txirrindulariak eta Pirritx, Porrotx eta Mari Motots.

Mobi Bik Eguna elkartearen berri emateko eta haien egitasmoak aurrera eramateko dirua lortzeko antolatu du Aspanovasek, egun osoan zehar umorea izango delarik ardatz: Izan ere, umorea baita gaisotasunari aurre egiteko botikarik onena. Goizean bizikleta bira antolatu dute haurrentzat txirrindulari profesionalekin. Eguerdian bertsolariak, abesbatzak, Wazemank eta hainbat sorpresa izango dira. Arratsaldean ginkana-katxondeoa txirrindulari, arraunlari etabarrekin, eta amaitzeko, 17, 30etan pailazoon emanaldi berezia, hamaika gonbidatu kilikagarrirekin.

Bertara gonbidatu nahi zaituztegu guztiok, eta han ikusi ahal izango duzue tristurak eta pozak goxoagoak direla elkarrekin partekatzen ditugunean, eta betetzen goazen urteak baino, garrantzitsuagoak direla bizitzen ditugun abenturak. Hori erakusten digute guri eguneroko jardunean Aspanovaseko lagunek.

GORA ASPANOVASEKO PIRATAK!

Category:

Education

Tags:

• aspanovas
• zarautz
• mobi-bik
• pirritx
• porrotx
• marimotots
• katxiporreta
• yt:stretch=16:9