Carlos Childe telonero de john mayall na Coruña

O blues na botella de Carlos Childe conseguiu convencer ao xurado de Radio Voz. O veterano músico galego será o teloneiro de John Mayall no único concerto que o mítico bluesman británico ofrecerá en Galicia. Un xurado composto polos xornalistas Fernando Molezún, Javier Becerra e Juan Torreiro, de La Voz de Galicia e Radio Voz, o crítico Nonito Pereira e Enrique Pena, xerente do coruñés recinto de Palexco -onde se celebrará o concerto-, deron a máxima puntuación á canción Blues in the Bottle, enviada ao concurso organizado por Radio Voz e a empresa promotora do concerto. A Coruña é a única cidade da xira española na que Mayall terá teloneiro. A empresa Quearte, promotora do concerto, espera que haxa un cheo total, xa que fai 18 anos que non toca na cidade. A xira de John Mayall comezará en Bilbao o próximo día 14, e para este concerto de apertura están esgotadas as entradas desde hai un mes.

Carlos Childe impúxose a un total de máis de 70 participantes (entre solistas e grupos), que propuxeron as súas cancións durante o certame. Childe, que o ano pasado gañou o Noroeste Pop Rock, é un cantante e compositor cuxa traxectoria sempre estivo ligada ao blues e á música tradicional dos Estados Unidos. Co seu primeiro traballo, Cooking Melodies, logrou moi boas críticas. Ademais, puxo voz ao tema principal da película O Apóstolo, que se estreará este ano, e en cuxa banda sonora participa o dúas veces nomeado ao Óscar Philip Glass. Na canción Blues in the Bottle, que lle permitirá ser o teloneiro de John Mayall, toca xunto con Luís Tinaquero, un dos fundadores da banda Miki Nervio & The Bluesmakers.

O xurado destacou a alta calidade dos grupos que se presentaron ao concurso. Bandas veteranas, solistas, grupos con pouca experiencia pero moitas ganas, estilos musicais de todo tipo -do folk ao hiphop, pasando polo rock e o pop- deixaron as súas propostas para tratar de telonear a unha das lendas vivas do blues.

O concerto de Mayall será o 16 de xuño, no Palexco da Coruña. As entradas custan 25,30 e 35 euros, e pódense comprar a través da web de Caixa Galicia, e os días 15 e 16 de xuño, no despacho de billetes do recinto.

Category:

Music

Tags:

• Carlos
• Childe
• telonero
• john
• mayall
• Coruña
• palexco