Martin Bosch - Lochtfoto - 14 april 2011 (Twents Offensief II)

Lochtfoto

Ik heb nen foto oet de locht woarop oons hoes nog steet
Et stun doar midden in de stad, de stroat was nich zoo breed
En a'j dat zoo van boavn zeet, wat was de weerld dan klean
Wieder vort as keark en school hoovn ik hoast nooit te wean

Doar um 'n hook ha'j Bubbe dee tabak en dröpkes had
A'k zea: ik mai nich vroagen, dan kreeg ik altied wat
Mer Bubbe deu de ramen dicht, gas los, deur op slot
Ze is nog dreenneagntig wörden, vaa sleug het raam kapot

Doar langs de Noorderhagen en de poort van de febriek
Langs n tuin, de schilferboom, het hoes met et portiek
Doar leup ik elken dag noar school en god kon mie doar zeen
En moo zea: god löp met die met, mer ik dörvn best alleen

Juffrouw Voonk dee wörden rood as ik an 't dreumn was
Ze smeet n bössel of het kriet vlak langs mie deur de klas
Ze gaf mie mangs nen striekerd of ze nam mie in de grep
En rammeln mie fleenk deur de baank, van rugleuning noar klep

De köster kwam veur misdienaars, hee haaln ze oet de klas
Veur n brulft of begrafenis, het mooiste wat der was
En sleug ie dan de gong te hard, dan kree'j n kwoad gezicht
Zun kwoad gezicht as van nen duvel bie het leste godsgericht

De school is weg, het hoes is vort, der is wat aanders bouwd
A'k doar nog mangs es langes kom is 't nich meer zoo vertrouwd
Mer op den foto oet de locht, doar zee'j nog alles stoan
De stad verjongt en ik wörd oald, zoo heurt het ok te goan

Tekst en muziek: Martin Bosch.

Hier op het Twents Offensief II op donderdag 14 april 2011 in Media Art Café Berlijn in Enschede.
Eerst in gesprek met spreekstalmeester Paul Abels.
Camera: Hein van der Vliet.

Category:

Music

Tags:

• Martin
• Bosch
• Lochtfoto
• Paul
• Abels