Manifestación en contra dos recortes do PP na sanidade

OS MANIFESTANTES ENTRAN NA PRAZA DO CONCELLO
MANIFESTACIÓN DO 27 DE OUTUBRO DE 2011

6.000 persoas opóñense no Barco á nefasta xestión sanitaria de Pilar Farjas e aos recortes na sanidade pública do Partido Popular. E é que está claro que cando se goberna mal, a xente fala (até se moviliza), agora o problema é que se escoite desde San Caetano. O Barco falou, e falou claro: non queremos a área sanitaria integrada en Ourense, non queremos recortes na sanidade pública, e non queremos privatizacións.

As comarcas de Valdeorras, Trives e Viana deron unha lección, calando a todos os que din que ninguén aquí se moviliza. Quizais agora era cando tiñan que falar todos aqueles que din que os que pertencemos á Plataforma andamos a manipular a información. A cidadanía non é parva, e sabe ler os decretos que publica a Consellería no DOG.

A convocatoria da Plataforma en defensa da sanidade pública da área do Barco foi secundada por seis mil persoas que fixeron o recorrido sen incidentes. Malia a que o tempo ameazaba con chuvia, a auga non estivo presente na reivindicación que saíu de fronte ao Pavillón de Calabagueiros do Barco, recorrendo as rúas Conde Fenosa e Marcelino Suárez para rematar na Praza do Concello. Á manifestación sumáronse outras plataformas sanitarias como Prosadi Ourense, Pladesapu de Monforte, ou SOS Sanidade Pública (Galicia).

E onde estaba o PP?, na casa! Ningún dirixente do Partido Popular, ningún concelleiro ou concelleira. É que non son quen de afastarse do aparato do seu partido para defender o piar fundamental do benestar social? Ou será que non queren estar a carón da veciñanza?

Pola contra, desde outras organizacións si se fixeron verdadeiros esforzos vindo representantes e cargos orgánicos, ou alcaldes da área sanitaria, como o de Manzaneda. Parece que os numerosos alcaldes populares do oriente ourensán non queren defender a sanidade pública.

A marea violeta formada por pancartas, autocolantes e carteis desta cor coreou varias consignas, algunhas alentadas pola organización e outras espontáneas. Entre elas puidemos escoitar "Conselleira, trapalleira" "Feijoo, escoita, a área non se toca" ou "a Ourense de visita, aquí os especialistas"

Category:

People & Blogs

Tags:

• manifestación
• O Barco
• Valdeorra
• Trives
• Viena
• Área Sanitaria
• integrada
• PP
• Xunta
• Pilar Farjas
• Alberto
• Núñez
• Feijoo
• Consellería
• sanidade
• Galicia
• Valdeorras
• mobilización
• plataforma
• publica
• recortes
• somos
• unha
• área