Taith y Tri Copa Ysgol Bro Myrddin 2011 - Three peaks Trek

Taith y tri Copa Bro Myrddin 2011

Ar ddydd Iau Mehefin 23ain aeth carfan o ddisgyblion blwyddyn 12 ati i gwblhau taith y tri copa yn llwyddiannus. Roedd cyflawni taith o'r fath yn dipyn o her, ond dyna yn union a wnaeth 28 disgybl a sawl aelod o staff. Roedd y daith yn cynnwys cerdded i gopa Pen y Fan, Cader Idris a'r Wyddfa o fewn 24 awr. Dyma daith oedd yn gofyn am frwdfrydedd a dyfalbarhad, heb y rhain, fe fyddai pawb wedi methu.

Dechreuwyd y daith am 7 o'r gloch ar fore dydd Iau gyda phawb yn hanner cysgu ac yn nerfus am yr hyn oedd yn eu hwynebu. Wrth gyrraedd Pen y Fan, roedd pawb yn awyddus i gyrraedd y brig, ac er dyma'r copa isaf o'r tri, yn 823 metr o uchder, nid gwaith hawdd oedd cyrraedd y brig, yn enwedig gyda'r niwl isel. Cadarnhaodd yr athrawon wrth i ni gwblhau Pen y Fan mai ni oedd y grŵp cyflymaf ers blynyddoedd, er bod sawl un yn teimlo'n hynod o flinedig ar ôl dringo'r mynydd.

Yn ôl ar y bws mini wedyn am daith dair awr i Ogledd Cymru i ddringo'r mynydd nesaf, yr un mwyaf anodd yn ôl yr athrawon, Cader Idris. Roedd y mynydd yn 893 metr uwchben lefel y môr a llwyddodd ambell aelod o'r grŵp ei gwblhau mewn amser nodedig o 2 awr a chwarter. Roedd y daith yn un fentrus ac anturus tu hwnt wrth i ni gerdded ar lwybr gyda chwymp o 200 metr lawr ochr y clogwyni.

Wrth deithio i'r hostel, cafwyd sioc wrth ddarganfod nad gwesty 5 seren oedd yn aros amdanom, ond gwesty heb unrhyw seren! Er hyn, daeth cwsg anesmwyth ac yna her copa uchaf Cymru -- Yr Wyddfa! !

Roedd pawb yn amlwg wedi blino o'r diwrnod blaenorol, ond gwnaeth pawb eu gorau glas wrth ddringo'r mynydd oedd yn 1085 metr o uchder. Roedd wir yn sialens ond wrth weithio fel grŵp a chymell ein gilydd, cyrhaeddodd y disgyblion a'r staff gopa'r mynydd mewn amser da er mwyn cael amser i ymlacio a mwynhau'r golygfeydd ysblennydd yn y caffi.

Bu'r grŵp yn lwcus gyda'r tywydd, arhosodd yn sych am y ddau ddiwrnod cyfan. Fe wnaeth pawb fwynhau'r profiad gwych a roddwyd iddynt gan yr adran chwaraeon a theimlai pawb falchder mawr yn eu camp. Diolch i'r holl athrawon am eu cwmni ar y daith ac yn enwedig i Mr Hefin Elias am drefnu'r digwyddiad.

Category:

Education

Tags:

• tri copa. bro myrddin
• ysgol
• school
• 3 peaks
• climbing
• mynydda
• bro
• myrddin
• youth
• ieuenctid
• hwyl
• fun
• club
• Mountain
• Canyon
• National
• Mountains
• Park
• Hiking
• Lake
• Nature
• Climb
• Ridge
• wales
• cymru
• Trail
• Dancing
• National Park
• Jones
• Dance