Giuseppe Coniglione leggi La turnata di l'amanti carziratu (cantu pupulari sicilianu)

Sorti tiranna, bàrbara,
stidda chi curri a mia,
tu m'ha purtatu ad èssiri
dintra sta vicarìa;
sugnu carziratu nchiusu
ammenzu di quattru mura,
li piducchi e li cìmici
mi pìgghianu a muzzicuna:
su' comu l'armi santi.
Sempri talìu la strata;
mai mi vidu cumpàriri
la mè tiranna ngrata.
Nun haju patri e matri
chi m'addifènninu a mia.
Haju la Matri Santissima
e a Santa Rusulìa.
E già la varca vinni
pi pigghiàrisi a mia;
ca la sintenza è data
pi la Pantiddarìa.
Chi fussi ammenzu a lu mari,
li Turchi mi pigghiàssiru,
accussì l'amanti bàrbara
sciala e si pigghia spassu!
Iu nti ddi parti scuri,
unn'è la Scavunìa,
na Turca vitti vèniri
pi arriscattari a mia;
cu la papoccia jarna
e lu trubbanti jancu;
e iu l'amaru mischinu
cu la catina a ciancu!
Lu pòviru di mia
affrittu e ncatinatu,
pi vardia mi mìsiru
pi dappressu un surdatu.
O celu assai binignu,
cuncidimmillu un pocu:
fammi turnari ad èssiri
arreri a lu mè locu!
Mi vogghiu fari sèntiri
ca sugnu vinutu arreri:
- Dorazzia... dorazzia;
c'è pòviru furasteri.
- Vuliti la limòsina?
Mischinu mischineddu!
Nun haju àutri picciuli
ca nu graniceddu.
- Nun vogghiu la limòsina,
bedda, vogghiu a tia;
ca di luntanu vegnu
di la Pantiddarìa.
- Avaja, va jitivinni:
nun haju chi dàrivi.
A mia tutti m'hannu ad ammàttiri
sti gatti a pittinari!
- Birbanti, birbantuna!
Tu nun mi voi cu tia!
Picchì sugnu fattu làciru
tu ti scurdasti a mia!
- Figghiuzzu, mè figghiuzzu,
scòrdati lu passatu:
di n'àutru beddu giuvini
stu cori è annamuratu.
- Santu di pantanuni!
Sapiti chi farrìa?
Attacchirìa na sciarra
e mi la purtarìa.
Sorti tiranna, bàrbara,
siddu sta cosa sapìa,
mi cuntintava di mòriri
a la Pantiddarìa.
Avissi na menza spata,
o puru na carrabbina,
m'abbastarìa lu spìritu
di fari na ruina.

Category:

Education

Tags:

• Giuseppe
• Coniglione
• Pantelleria
• Pantiddaria
• Sicilia
• Sicilian
• Language
• Lingua
• Siciliana
• Sicilianu
• Siciliano
• Letteratura
• Littiratura
• Cantu
• pupulari
• sicilianu