Vllaznia - Dinamo 1-0 , Ne stadiumin Loro Borici, ndeshja finale me Tiranen - www.shkodra.ws

Vllaznia ka ruajtur të paprekur vendin e parë edhe pas ndeshjeve të javës së 31-të. Shkodranët kanë fituar minimalisht 1-0 kundër Dinamos, duke zhvlerësuar disi triumfin 3-1 të Tiranës përballë Shkumbinit. Takimi i luajtur në Loro Boriçi ka patur dy fytyra të ndryshme, me Vllazninë që ka dominuar në pjesën e parë dhe Dinamon në të dytën. Shkodranët kanë arritur të gjejnë rrugën e golit vetëm në minutën e 45-të, kur Sinani merr një penallti pas një pengimi në zonë. Nga pika e bardhë, Suad Lici nuk fal dhe kalon vendasit në avantazh. Në pjesën e dytë edhe pse me shumë mungesa në formacion, blutë kanë kërkuar me ngulm golin, duke rrezikuar disa herë, por pa arritur ta gjejnë atë. Fitorja e çon Vllazninë në kuotën e 63 pikëve, një më shumë se Tirana e vendit të dytë, kur duhen edhe dy javë kampionat.
Ndërkohë, bardheblutë nuk e kanë patur shumë të vështirë në ndeshjen me Shkumbinin, duke bërë detyrën në sajë të një fitoreje 3-1. Gjërat janë zgjidhur që në pjesën e parë, kur Tirana realizoi tre herë. Në fillim ishte Mujdragiç, ai që pas një gjuajtje-kros të Lilës e dërgoi topin në rrjetën e tij. Në minutën e 28-të, Gjergji Muzaka dyfishon shifrat për ekipin vendas, që drejtohej për herë të parë nga dyshja Mauro Bençivenga dhe Alban Tafaj. Minuta e 31-të sjell edhe golin e tretë, me autor Migen Memellin, që duket shumë pranë fitimit të Këpucës së Artë. Për bomberin pogradecar ishte goli numër 21 këtë sezon. Në pjesën e dytë, ndeshja është luajtur vetëm për të plotësuar 90 minutëshin, ndonëse Shkumbini arriti të shkurtonte shifrat me anë të Mujdragiç në minutën e 50-të.
Ndërkohë, një luftë mjaft e fortë vazhdon të zhvillohet në zonën e rënies nga kategoria, ku ekipet janë ngjeshur akoma më shumë. Në Fier, Apolonia ka mposhtur 2-0 Teutën, me dy gola të shënuar nga Sehad Haxhibuliç në pjesën e parë dhe Dhrami në të dytën. Fitorja e çon ekipin fierak në kuotën e 32 pikëve, aq sa Lushnja e Elbasani, të cilat e kanë mbyllur në barazim pa gola sfidën e zhvilluar mes tyre në Roza Haxhiu. Ndërkohë, Flamurtari ka mposhtur 2-1 Partizanin në Vlorë dhe thuajse e ka siguruar qëndrimin, ndërsa 3 pikë të arta mori edhe Bylisi, që triumfoi 2-0 ndaj Besës së Kavajës. (a.r/balkanweb)

Category:

Sports

Tags:

• shkoder
• shkodra
• lajme
• fotografi
• video
• forum
• chat
• shkodran
• shkodren
• vllaznia