Euskal Herria Batera

EH Batera 2020ko Aberri Egunaren testuinguruan sortu zen ekimen herritarra da. COVID-19 pandemiaren ondorioz, etxean konfinatuta, Aberri Eguna etxetik, Euskal Herri osoan, aldi berean eta modu bateratuan ospatzeko deialdia egin zuten zenbait esparrutako hainbat herritarrek. Ikurrak balkoira atera eta hiru kanta aldi berean kantatuz ospatu genuen. 2021ean, oraindik pandemiaren testuinguruan, Aberri Eguna berriz ere batera ospatzeko deialdia egin zen, baina oraingoan herrietako plazetan. Batera aritzeko uneak herritarren artean ilusioa eragin zuen. 2022an, nork bere deialdia egin zuen. Euskal Herria Baterak bateratasunean jarri genuen indarra eta urteroko ekitaldia Aberri Egunaren bezperara eramatea erabaki genuen. Urruñan, Antton Abadiak 1851n bultzatutako lehen Lore Jokoak ospatu ziren toki berean, Abadia adierazpena aurkeztuz. 2023an, Ukrainiaren eta Errusiaren arteko gerra tartean zela, herri gisa bagarela eta badugula adierazi genuen Miramar Jauregian, Donostian.